《You hate me but I am part of you》
以下內容，如有雷同，實屬巧合同不幸 …
我諗大家打工仔都試過做appraisal, 聞說appraisal係會影響你嘅performance bonus, but i don't fxxking care。 對於低級職員嚟講，本身bonus就唔多，所以appraisal嘅分數，對bonus嘅影響根本唔大。appraisal嘅分數只係得啖笑，高分心情會好啲，嗰排工作就會落力啲，低分心情就差啲，更加喺背後詛咒阿姐多啲。 而大多數嘅打工仔，都唔會因為appraisal而改過自身。
唔知大家有冇遇到/遇緊一個咁嘅上司 ….. 我就曾經有一個阿姐，喺我每一次嘅appraisal 都寫到超低分，甚至爭啲唔合格。從來亦都唔會喺佢口中，得到任何嘅稱讚或者endorsement。 喺其他同事嘅口中得知，呢個阿姐做人相當手緊，無論係佢自己嘅荷包，定係對同事appraisal嘅分數都係咁。 基本上。人人喺佢心目中都唔合格，唔達到佢嘅要求，幫唔到佢手， 大把嘢可以挑剔到。
退一百萬步嚟睇，如果我係呢間公司嘅老細，我見到呢個阿姐率領一team 人，所有手下，喺阿姐嘅評分當中，都係唔合格嘅。咁呢個阿姐，其實係唔係都係一個唔合格嘅阿姐呢？ 如果成條team都係唔合格，成條team都係廢柴， 呢個阿姐應該係盲嘅，完全冇眼光嘅，啲人佢自己請返嚟，但請返嚟又覺得全部都有問題。其次， 縱使請咗返嚟，先發現啲手下有問題，乜阿姐完全冇能力訓練下屬，令佢哋有問題都變得冇問題 㗎咩？
係唔係成team都有問題？好明顯唔係，阿姐唔察覺， 其實所有下屬嘅總分，就係阿姐嘅總分。 阿姐將所有下屬嘅評分，評到咁低分，其實係一個好蠢，同埋唔識做嘅舉動。 你貶低自己嘅手下，如同貶低緊自己，同時亦令到所有人條氣唔順。阿姐冇為意，you hate me? but i am part of you..
我成日聽到香港政府高官出嚟譴責市民，其實我想講，市民同埋政府高官唔係唇齒相依，我哋直情係part of you, 點解你可以做到政府高官？就係因為有我哋一班蟻民。你強烈譴責我？我強烈譴責你譴責你自己。社會撕裂得咁犀利，就係政府高官將問題分成你同我， 根本問題係大家開心share嘅。朱鎔基曾經講過，香港回歸前冇問題，如果回歸之後，香港喺中共手上搞唔好，中共有好大嘅問題同責任。
今晚我聽完杜汶澤嘅今宵多珍重，都有好大嘅感受。我哋呢場內戰冇 leader, 即使我哋呢場內戰最後得到最大嘅勝利，成功光復之後，整頓先至係最混亂嘅時刻。 識得推翻政權嘅人，未必識得整頓推翻之後嘅局勢。正如孫中山推翻滿清一樣，推咗之後佢都搞唔掂。 又正如我哋一班不停指出 阿姐不是嘅下屬，都未必識做阿姐。光復之後，我哋要揾到個leader, 大家信服而有能力嘅確係難。畢竟requirement of一個自由民主嘅領袖， 必然係高過requirement of一個獨裁嘅領袖。
咁係唔係放棄推翻呢？唔係，而係我哋要有長時間作戰，鬥長命嘅心理準備，自己好好珍重，當我哋光復成功之後，要搵到一個領袖，整頓混亂嘅局勢，真係漫漫長路，i am part of 大家，就大家一齊珍重啦。
Search